TESTU ZIENTIFIKOA

Odol-analisi bidez, organo-errefusei antzemateko modua asmatu dute.

Hartzaileei bizirik irauteko aukera ematen badie ere, bizitza osoan kontrolatu beharreko zerbait ere bilakatzen da haientzat organo-transplantea. Kontrol hori errazteko modua asmatu dute Estatu Batuetan.

Organo-transplanteak jasotzeak bizirik irauteko aukera paregabea ematen die pazienteei. Hala ere, bizitza osoan kontrolatu beharreko zerbait bilakatzen da haientzat. Beren gorputzak kanpotik sartutako organoaren kontra egin dezake, eta halabeharrez eten behar izaten dute eraso hori, organoa galtzera ez iristeko. Eta, horrekin batera, aldian-aldian azterketak egin behar izaten dituzte, organoak babestuta jarraitzen duen kontrolatzeko. Bada, Estatu Batuetan kontrol hori errazago egiteko modu bat proposatu duteStanford Unibertsitateko ikertzaile batzuek: gorputza jasotako organoaren kontra egiten ari den odol-analisi bidez jakiteko modu bat asmatu dute.

Gaur egun, oso nekeza da errefusa gertatu den jakiteko erabiltzen den prozesua. Transplantatutako organoaren zatitxoak hartzen dituzte zuzenean (hau da, biopsiak egiten dituzte), eta oso maiz egin behar izaten dute hori: hasieran, transplantea egin eta lehenengo urtean, gutxienez hamabi biopsia egiten dizkiete, eta, hurrengo lau urteetan beste bi edo hiru urtean.

Transplanteak jasotzen dituztenen % 40k, gutxi gorabehera, lehenengo urtean errefusatzen dute organoa. Azken batean, gorputzak kanpotik sartzen zaion beste edozein gorputz arrotzen aurrean bezala erantzuten du. Gorputz arrotz guztiak kaltegarritzat jotzen ditu, eta immunitate-sistema haien kontra lanean jartzen du. Horregatik, transplantatzeko prest dauden organoentzat hartzaile egokienak bilatzen dituzte espezialistek. Alegia, emaileak eta hartzaileak ahalik eta antzekotasun gehien izan ditzaten saiatzen dira, immunitate-sistemaren erasoa ahal duten neurrian saihesteko.

Dena den, botika bidez ere laguntzen dute gorputzaren berezko erreakzio hori eteten, eta immunitate-sistemaren erantzuna geldiarazten duten botikak ematen dizkiete transplanteak jasotako pazienteei.

Neurri horiek guztiak hartuta ere, batzuetan gertatzen da gorputzak organoa errefusatzea. Horrelakoetan, garrantzitsua da ahalik eta azkarren antzematea errefusaren sintomei, errazagoa delako haren kontra egitea. Horregatik egiten da hain jarraipen estua transplanteak egin eta gero.

Zientzia.net-etik aterata. Eguneratze-data : 2011/4/19

ARATZ GAMARRA